گوترش به نشست بین‌المللی تاجیکستان: تامین امنیت مرزها، کلید مبارزه با تروریزم است

دبیرکل سازمان ملل در پیامی ویدیویی به نشست هم‌کاری‌های بین‌المللی و منطقه‌ای برای مبارزه با تروریزم در دوشنبه تاجیکستان گفت که امنیت مرزها کلید مبارزه با تروریزم است. آنتونیو گوترش در این نشست که از حضور تروریست‌ها در افغانستان ابراز نگرانی شد، تاکید بر هم‌کاری‌های چندجانبه کرد.

پیک‌آفتاب: گوترش در این پیام گفته است: “سازمان ملل متعهد است که دست در دست شما در این تعهد حیاتی کار کند”.

او افزود: “من از تلاش‌های تاجیکستان و شرکای ما برای حمایت از هم‌کاری‌های بین‌المللی در پیش‌گیری و مبارزه با تروریزم استقبال می‌کنم”.

مقام‌های تاجیکستان در این نشست از افزایش قاچاق مواد مخدر از افغانستان و هم‌چنین حضور گروه‌های تروریستی در این کشور ابراز نگرانی کردند.

دادستان کل تاجیکستان: قاچاق مواد مخدر از افغانستان، دو برابر افزایش یافته است

وزیر داخله تاجیکستان به شرکت‌کنندگان گفته است که طالبان تاکنون برای بیش از سه هزار تن «از اعضای گروه‌های تروریستی» پاسپورت افغانستانی صادر کرده است.

آنتونیو گوترش در این نشست تاکید کرد: “بیایید باهم برای تقویت صلح و حقوق بشر در آسیای‌میانه و فراتر از آن تلاش کنیم.”

این اظهارات در حالی بیان می‌شود که پیش‌تر دبیرکل ﺳﺎﺯﻣﺎﻥ ﻣﻠﻞ خواستار هم‌آهنگی سازمان‌ها و نهادهای منطقه‌ای در جهت تامین امنیت جهانی شده بود. او به شورای امنیت سازمان ملل گفته بود که حمایت از افغانستان باید در صدر موضوعات جهانی قرار گیرد.

گوترش: امنیت جهانی به امنیت افغانستان گره خورده است

نشست «همکاری بین‌المللی و منطقه‌ای امنیت و مدیریت مرزها برای مقابله با تروریزم و ‌جلوگیری از حرکت تروریست‌ها» روز گذشته ۲۶ میزان، برای دو روز در دوشنبه، پایتخت تاجیکستان آغاز به کار کرد.

این نشست دو روزه با هم‌کاری سازمان امنیت و هم‌کاری اروپا، تاجیکستان، دفتر مبارزه با تروریزم سازمان ملل، اتحادیه اروپا، عربستان سعودی و قطر برگزار شده است.

این در حالی مطرح می‌شود که پیش‌تر رئیس جمهور تاجیکستان تاکید کرده بود که به منظور پیش‌گیری از خطرات، ایجاد یک کمربند امنیتی در اطراف افغانستان ضروری است.

رئیس جمهور تاجیکستان: ایجاد کمربند امنیتی در مرزهای افغانستان لازم است

تاجیکستان: افغانستان تختهِ خیز بنیادگرایی است