رئیس جمهور تاجیکستان: ایجاد کمربند امنیتی در مرزهای افغانستان لازم است
رئیس جمهور تاجیکستان تاکید کرده است که به منظور پیش‌گیری از خطرات، ایجاد یک کمربند امنیتی در اطراف افغانستان ضروری است.
رئیس جمهور تاجیکستان تاکید کرده است که به منظور پیش‌گیری از خطرات، ایجاد یک کمربند امنیتی در اطراف افغانستان ضروری است.
پیک‌آفتاب: امام‌علی رحمان، رئیس جمهور تاجیکستان می‌گوید که تروریست‌ها هم‌چنان در تلاش عبور از مرزها هستند.
او پیشتر گفته بود که در افغانستان ده‌ها هزار «مجاهد و انتحاری» آموزش می‌بینند.
به گفته وی، تروریست‌ها از خاورمیانه به افغانستان منتقل می‌شوند و فعالیت گروه‌های تروریستی در این کشور تهدیدی جدی برای آسیای‌میانه است.
این در حالی است که پیشتر تاجیکستان با ابراز نگرانی از وضعیت امنیتی افغانستان، ادعا کرده بود که این کشور در حال مبدل شدن به پناهگاه تروریستان است.
رحمان این اظهارات را در نشست «همکاری بین‌المللی و منطقه‌ای امنیت و مدیریت مرزها برای مقابله با تروریزم و جلوگیری از حرکت تروریست‌ها» بیان کرد.
این نشست امروز سه‌شنبه 18 اکتبر در دوشنبه، پایتخت تاجیکستان برگزار شده است.
امام‌علی رحمان در این نشست با اشاره به افغانستان، تهدیدات امنیتی منطقه را جدی دانست و از گسترش افکار افراطی در بین جوانان هشدار داد.
افزون بر موارد بالا، پیشتر رهبران شماری از کشورهای عضو سازمان همکاری شانگهای، صلح و ثبات افغانستان را برای منطقه مهم دانسته و به ضرورت جلوگیری از تروریزم در افغانستان تاکید نموده بودند.
سازمان همکاری شانگهای به تامین ثبات و جلوگیری از تروریزم در افغانستان تاکید نمود
رئیس جمهور تاجیکستان گفت در برخی از مناطق جهان انواع تروریزم تبلیغ می‌شود و با شعارهای ایدئولوژی افراطی بر روی ذهن جوانان کار می‌شود.
او گفته است که با وجود تلاش چشم‌گیر سازمان‌های بین‌المللی و منطقه‌ای، برخی کشورها رویکرد واحدی در جلوگیری از رشد تروریزم ندارند.
رحمان خطاب به اشتراک‌کنندگان هشدار داد تا زمانی‌که همه طرف‌های ذی‌نفع رویکرد مشترک نداشته باشند، مبارزه با تروریزم و تبلیغ افراط‌گرایی غیرممکن است.
این در حالی مطرح می‌شود که پیشتر امام‌علی رحمان، رئیس جمهور تاجیکستان پیشنهاد کرد که تاجیکستان ظرفیت‌های خوب لوژستیکی برای ارایه کمک‌های بین‌المللی به افغانستان دارد.
امام‌علی رحمان: تاجیکستان ظرفیت‌های خوب لوژستیکی برای کمک به افغانستان دارد
