تاجیکستان ایجاد پایگاه نظامی چین در نزدیکی خاک افغانستان را تکذیب کرد
تاجیکستان: در چارچوب توافقنامه همکاری بین وزارت امور داخله تاجیکستان و وزارت امنیت عمومی چین در زمینه زیرساخت‌های موجود تیم پولیس واکنش سریع نهاد مبارزه با جنایت سازمان یافته، قرار است مانور نظامی مشترکی در ولایت بدخشان تاجیکستان صورت گیرد.
وزارت امور داخله تاجیکستان گزارش‌ها درباره ساخت یک پایگاه نظامی توسط چین برای پولیس تاجیکستان در نزدیکی مرز با افغانستان را تکذیب کرد.
پیک‌آفتاب: وزارت امور داخله تاجیکستان در بیانیه‌ای اعلام کرد که گزارش‌های مبنی بر ایجاد پایگاه نظامی چین در تاجیکستان و در نزدیکی خاک افغانستان نادرست بوده و چنین اقدامی در دستور کار قرار نگرفته است.
بر اساس بیانیه، در چارچوب توافقنامه همکاری بین وزارت امور داخله تاجیکستان و وزارت امنیت عمومی چین در زمینه زیرساخت‌های موجود تیم پولیس واکنش سریع نهاد مبارزه با جنایت سازمان یافته، قرار است مانور نظامی مشترکی در ولایت بدخشان تاجیکستان صورت گیرد.
خاور، رسانه دولتی تاجیکستان گزارش کرده است که تمامی تجهیزات و هزینه‌های لازم در طول مانور نظامی مشترک توسط چین تامین و پرداخت خواهد شد.
پیش از این نیز “وانگ ونبین” سخنگوی وزارت خارجه چین نیز درا واکنش به گزارش‌ها مبنی بر ایجاد پایگاه نظامی چین در تاجیکستان گفته بود: “با اطمینان می‌توانم بگویم که چین در آسیای مرکزی پایگاه نظامی ندارد.”
این در حالی است که روز 6 عقرب، یک سخنگوی پارلمان تاجیکستان به خبرگزاری فرانسه گفته بود که مجلس نمایندگان تاجیکستان طرح ساخت پایگاه پولیس این کشور توسط چین را در منطقه اشکاشم در مرز افغانستان تصویب کرده است. این سخنگوی پارلمان تاجیکستان در ادامه می‌افزاید که “همه ساخت و سازها به ارزش 8.5 میلیون دالر توسط طرف چینی تامین می‌شود و پس از ساخت، پایگاه به پولیس تاجیکستان منتقل خواهد شد.
