نگرانی رییس جمهور تاجیکستان نسبت به تهدیدهای تروریستی از خاک افغانستان

پیک‌آفتاب: امام‌علی رحمان، رییس جمهور تاجیکستان در نشست سران کشورهای آسیای مرکزی گفته که تهدیدهای تروریستی در مرز‌های افغانستان با تاجیکستان، افزایش پیدا کرده‌است.

این نشست مشورتی که روز گذشته در شهر دوشنبه، با حضور سران کشورهای آسیای مرکزی راه اندازی شده بود، او نسبت به افزایش تهدیدهای تروریستی از خاک افغانستان به شدت ابراز نگرانی کرده است.

امام علی رحمان از افزایش چندین برابر تولید مواد مخدر و تردد از مرز تاجیکستان خبر داده‌است.

او تصریح کرده که به دنبال تحولات اخیر در افغانستان، تولید مواد مخدر و ترانزیت آن از مرز تاجیکستان افزایش قابل ملاحظه‌ای داشته‌است.

وی اضافه کرده که در سال ۲۰۲۲ میلادی نزدیک به پنج تن مواد مخدر کشف و ضبط شده که ۲۲ درصد افزایش را نسبت به سال ۲۰۲۱ میلادی نشان می‌دهد.

رییس جمهور تاجیکستان هم‌چنین گفته بحران انسانی در افغانستان رو به وخامت است و در این راستا ما آمادگی داریم تا از امکانات این کشور برای ارسال کمک‌های بشردوستانه به افغانستانی‌ها استفاده شود.

قابل ذکر است که او پیش از این نیز نسبت به تهدیدهای تروریستی و افزایش این گروه‌ها در داخل افغانستان ابراز نگرانی کرده بود.

امام علی رحمان چندی پیش ده‌ها پوسته امنیتی را در امتداد مرز با افغانستان فعال کرد و هشدار داد که تهدیدها از خاک افغانستان روز به روز در حال افزایش است.

در حالیکه بیشتر کشورها به شمول تاجیکستان نسبت به افزایش تهدیدهای تروریستی از خاک افغانستان ابراز نگرانی می‌کنند، اما حکومت سرپرست امارت سالامی می‌گوید که هیچ تهدیدی از خاک این کشور در مقابل همسایه ها نخواهد بود و امارت اسلامی به هیچ گروهی اجازه نمی‌دهد تا از خاک افغانستان سایر کشورها را تهدید کند.