رهبر شورشیان تاجیک کشته شد

وزارت داخله تاجیکستان مرگ رهبر شورشیان این کشور که در ولایت کوهستانی خاروغ در نزدیکی مرز افغانستان فعالیت می‌کرد را رسماً تایید کرد.

پیک‌آفتاب: مرکز مطبوعاتی وزارت داخله تاجیکستان، کشته شدن «محمد باقروف» رهبر گروه تروریستی فعال در این کشور که به سازمان‌دهی شورش علیه دولت این کشور متهم بود را رسماً تایید کرد.

وزارت داخله تاجیکستان گفته است که در مرکز منطقه خودمختار «گورنو-بدخشان» شهر خاروغ، رهبر یک گروه تروریستی که جنایت‌های سازمان‌یافته را انجام می‌داد، به نام «باقروف» در نتیجه یک درگیری داخلی کشته شده است.

وزارت داخله تاجیکستان تصریح می‌کند که مقتول به سازمان‌دهی شورش در خاروغ، راهپیمایی‌های ضد دولتی و بسته کردن بزرگراه بین‌المللی «خاروغ-کلما» که تاجیکستان را به چین متصل می‌کند متهم بود.

براساس گزارش رسانه‌های محلی، از چندی بدین‌سو شورش‌ها در ولایت کوهستانی «خاروغ» بدخشان در آن طرف مرز افغانستان آغاز گردیده و نگرانی جدی رهبران این کشور را نیز برانگیخته است.

برخی کارشناسان معتقدند که طرح ناامن‌سازی آسیای میانه با شورش‌ها در نقاط مرزی تاجیکستان و ازبیکستان عملاً کلید خورده است.