اسارت 143 خلبان و خدمه اردوی افغانستان در تاجیکستان

قرار گزارش‌ها، ۱۴۳ خلبان و کمک خلبان نیروهای هوایی اردوی ملی افغانستان ازچند ماه به این سو در تاجیکستان زندانی هستند. این خلبان‌ها و کمک‌خلبان‌های اردوی افغانستان در روز سقوط حکومت پیشین، به تاجیکستان رفته بودند.

پیک‌آفتاب: روزنامه نیویارک‌تایمز امروز 16 عقرب، گزارش داده که دست‌کم ۱۴۳ خلبان و کمک‌خلبان اردوی پیشین افغانستان که در روز سقوط به تاجیکستان رفته بودند، در این کشور در زندان به سر می‌برند. یکی از خلبانان بازداشت شده در تاجیکستان به نیویارک‌تایمز گفته که در حال حاضر چندین هزار خلبان و خدمه هواپیما و کارکنان نیروهای هوایی دیگر افغانستان پنهان شده‌اند و احساس می‌کنند توسط ارتش امریکا، رها شده‌اند. به گفته‌ای او، اکنون این خلبان‌ها و کارکنان هوایی و خانواده‌هایشان با خطر جدی مواجه‌اند. این خلبان اردوی پیشین گفته است: “ما به ارتش و دولت امریکا اعتماد داشتیم که به ما کمک و ما را از این وضعیت خارج می‌کنند.”

از سویی هم، یک عضو نیروهای هوایی پیشین کشور در تماس تلفنی به نیویارک‌تایمز گفته است که پنج سال با نیروهای امریکایی کار کرده و در حال حاضر او و همکارانش از سوی این کشور فراموش شده‌اند.

این اظهارات نیروهای هوایی اردوی سابق افغانستان درحالی ابراز می‌گردد که جنرال دیوید هیکس، از آموزگاران نیروهای هوایی افغانستان، گفته است: «هیچ برنامه‌ای از سوی ایالات متحده برای انجام کاری برای بیرون کردن این افراد وجود ندارد.»

با این همه، وزارت امور خارجه امریکا گفته که با حکومت تاجیکستان برای خروج خلبانان نیروهای اردوی پیشین افغانستان مطابق جدول تعیین شده، ارتباط منظم دارد.

پس از سقوط دولت به دست طالبان ده‌ها خلبان اردوی افغانستان با هواپیماهایشان به تاجیکستان گریختند. این خلبان‌ها توسط نیروهای تاجیکستان بازداشت شدند.