طالبان: ما به کارمندان «جمهوریت» معاش نمی‌دهیم

شماری از کارمندان مراکز توزیع تذکره الکترونیک در اعتراض به پرداخت نشدن معاش‌شان، اعتصاب کاری کرده‌اند. به گفته این کارمندان، طالبان گفته‌اند ما به کارمندان «جمهوریت» معاش نمی‌هیم.

پیک‌آفتاب: کارمندان شماری از مراکز توزیع تذکره الکترونیکی در کابل، در اعتراض به پرداخت نشدن معاش‌شان، اعتصاب کاری کرده‌اند. این کارمندان با صدور قطع‌نامه‌ای گفته‌اند، ماه‌ها است که معاش دریافت نکرده‌اند.

این کارمندان در ادامه می‌افزایند که معاش ماه‌های ثور، جوزا و سرطان 150 کارمند، از زمان حکومت پیشین پرداخت نشده است و طالبان تنها معاش ماه‌های اسد، سنبله و میزان را پرداخت کرده‌اند. به گفته این کارمندان، طالبان در رابطه به پرداخت معاش ماه‌های قبل از سقوط حکومت پیشین به آن‌ها گفته‌اند: “شما به جمهوریت کارد کرده‌اید، معاش خود را از ما نخواهید.”

به گفته کارمندان تذکره الکترونیکی، اداره احصائیه و معلومات طالبان، استخدام کارمندان را افزایش می‌دهند، ولی در قسمت پرداخت معاش کارمندان خود تعلل می‌کند، در بخشی از اعلامیه این کارمندان آمده است: “معاشات کارمندان ۳۰۰ بست تا ماه ثور ۱۴۰۰ پرداخت نشده و این کارمندان مجبور شده‌اند تا دست به اعتصاب کاری بزنند.”

یکی از کارمندان اعتصاب کننده می‌گوید، وقتی حکومت طالبان تشکیل شد و کارمندان خواهان پرداخت معاش خود شدند، اداره احصائیه و معلومات طالبان به این کارمندان گفته که شما کارمندان «جمهوریت» هستید، ما به کارمندان جمهوریت معاش نمی‌دهیم.

کارمندان تذکره الکترونیکی به تاریخ نهم حوت ۱۴۰۰ نیز اعتصاب کاری کرده بودند، اما به گفته یکی از کارمندان، آن اعتصاب با میانجی‌گری مدیران مراکز توزیع تذکره الکترونیکی پایان یافت و به این اداره مهلت ده روزه به خاطر پرداخت معاش‌شان داده شده بود. اما حالا پس از پایان مهلت تعیین شده و اجرا نشدن خواست‌های این کارمندان، آنان دوباره دست به اعتصاب زده‌اند.

در همین حال، گفته می‌شود که اداره مرکزی احصائیه طالبان این کارمندان را تهدید کرده است، در صورتی‌که به اعتصاب در این زمینه ادامه دهند، منفک خواهند شد.