دیدار مکرون و رحمان در کاخ الیزه/ مخالفان به رسمیت‌شناختن طالبان، دغدغه‌ای مشترک دارند
دعوت فرانسه از آقای رحمان در کاخ الیزه نشانه مهمی است که فرانسه معتقد است کشورهای منطقه می‌توانند در بحران افغانستان نقش ایفا کنند.
امانوئل مکرون، رئیس جمهوری فرانسه و امام علی رحمان رئیس جمهوری تاجیکستان شام روز چهارشنبه در پاریس به خبرنگاران گفتند که در مورد وضعیت َضپامنیتی منطقه آسیای‌میانه و افغانستان با هم گفتگو می‌کنند.
پیک‌آفتاب: آقای مکرون گفت که تاجیکستان با افغانستان یک مرز مشترک طولانی دارد و “ما در رابطه به این کشور دغدغه‌های مشترک داریم”. او افزود: “با رئیس جمهوری تاجیکستان در مورد کمک فرانسه برای تثبیت اوضاع در افغانستان، صحبت خواهیم کرد.”
در حال حاضر فرانسه و تاجیکستان دو کشوری اند که مخالفت شدید خود را علیه دولت امارت اسلامی طالبان در افغانستان آشکارا اعلام کرده‌اند. هر دو کشور پیشتر گفته‌اند که رژیم طالبان را به خاطر رفتار این گروه در برابر زنان و فراگیر نبودن حاکمیت شان به رسمیت نمی‌شناسند.
دعوت فرانسه از آقای رحمان در کاخ الیزه نشانه مهمی است که فرانسه معتقد است کشورهای منطقه می‌توانند در بحران افغانستان نقش ایفا کنند.
رئیس جمهوری فرانسه همچنین گفت: “نباید با گروه‌های تروریستی و مخالفان ارزش‌هایی که ما از آنها دفاع می‌کنیم، به ویژه حرمت به حقوق زنان، سازش شود”.
امام علی رحمان هم گفت تاجیکستان فرانسه را “شریک قابل اعتماد” در اروپا می‌داند.
در حالی‌که کشورهای همسایه افغانستان، از جمله ازبکستان، مدت‌ها پیش با طالبان ارتباط برقرار کرده‌اند، مقامات تاجیک از همکاری با گروه طالبان خودداری کرده‌اند.
رئیس جمهور رحمان پیشتر از تجمع “گروه‌های تروریستی” در مرز جنوبی تاجیکستان شکایت کرده و اخیرا یک نشان افتخاری را به احمدشاه مسعود، فرمانده پیشین ضد طالبان در افغانستان اعطا کرده است.
همچنین گزارش شده که تاجیکستان به رهبران مقاومت علیه دولت طالبان نیز پناه داده و از آنها حمایت کرده است.
طالبان هم پیشتر تاجیکستان را به دخالت در امور افغانستان متهم کرده بود. طالبان به دوشنبه هشدار داده بود که “برای هر اقدامی عکس‌العملی در پی خواهد داشت.”
رئیس جمهوری تاجیکستان در هفتاد و ششمین اجلاس مجمع عمومی سازمان ملل متحد، گفته بود “در حالی که نمی‌خواهد در امور داخلی افغانستان مداخله داشته باشد، ولی باور دارد که برای حل مسائل سیاسی و امنیتی این کشور، باید انتخابات برگزار شود و دولتی با مشارکت همه اقوام، به میان بیاید”.
رئیس جمهوری تاجیکستان می‌گوید تاسیس هر گونه حکومت بدون در نظرداشت منافع همه اقوام افغانستان، پیامد‌های “فلاکت‌بار” خواهد داشت.
