افزایش صادرات تاجیکستان به افغانستان

رسانه‌های تاجیکستانی از افزایش صادرات این کشور به افغانستان خبر می‌دهند.

پیک‌آفتاب: خبرگزاری «Aki press» آسیای میانه روز گذشته 24 سرطان، در گزارشی نوشته است که صادرات تاجیکستان به افغانستان در سال روان به 40 میلیون دالر رسیده است.

گزارش می‌نویسد: “تاجیکستان در سه ماه نخست امسال، به ارزش 40 میلیون دالر به افغانستان صادرات داشته است.”

این آمار در مقایسه با عین زمان در سال 2021، حدود 6 میلیون دالر افزایش را نشان می‌دهد.

این رسانه‌ گزارش می‌دهد که تاجیکستان بیش‌تر سمنت، زغال‌سنگ، برق و محصولات زراعتی به افغانستان صادر می‌کند.

پس از به قدرت رسیدن طالبان، درگیری‌های مرزی و حملات گروه تروریستی داعش در امتداد مرز افغانستان با کشورهای آسیای میانه افزایش یافته و گزارش‌هایی از ایجاد تحریک طالبان تاجیکستانی نیز منتشر گردیده است.