اعمال محدودیت‌های تازه برای نهادهای آموزش عالی خصوصی

وزارت تحصیلات‌عالی در تازه‌ترین تصمیم خود، از نهادهای آموزش‌عالی خصوصی خواسته که پروسه استخدام اساتید خود را زیر نظر هیئت ویژه‌ای این وزارت انجام دهند. این وزارت همچنین گفته که استادان دولتی در اوقات رسمی نمی‌توانند در دیگر نهادها کار کنند.

پیک‌آفتاب: به گزارش خبرگزاری دولتی باختر، وزارت تحصیلات‌عالی، به نهادهای آموزش‌عالی خصوصی توصیه کرده تا روند استخدام اساتیدشان را زیر نظر هیئت موظف این وزارت انجام دهند.

این وزارت تاکید کرده که دانشگاه‌های خصوصی نمی‌توانند بدون تاییدی هیئت ویژه وزارت تحصیلات‌عالی اقدام به استخدام استاد نمایند.

وزارت تحصیلات‌عالی همچنین گفته که استادان دانشگاه‌های دولتی نمی‌توانند در اوقات رسمی در جای دیگر وظیفه اجرا کنند.

وزارت تحصیلات‌عالی می‌گوید که این تصمیم به هدف جلوگیری از جذب استادان غیرمسلکی گرفته شده است.