پول برق وارداتی از تاجیکستان، تاکنون پرداخت نگردیده است

مقامات اداره ملی برق تاجیکستان (NEA) می‌گویند که آن‌ها هم چنان برق را به افغانستان صادر می‌کنندف اما طالبان تاکنون پول برق را پرداخت نکرده‌اند.

پیک‌آفتاب: محمدعمر آسوزاده، رئیس شرکت ملی برق تاجیکستان روز گذشته ۲۱ سرطان، در یک نشست خبری گفته است که شرکت برق افغانستان (برشنا)، قرض‌داری خود را به گونه تدریجی می‌پردازد و تاکنون به گونه کامل آن‌را پرداخت نکرده است.

وی هم‌چنان می‌گوید: “تاجیکستان در حال حاضر روزانه 9 میلیون کیلووات برق در ساعت به افغانستان صادر می‌کند.”

براساس اطلاعات، تاجیکستان در سال گذشته، مجموعاً بالغ بر ۵۶.۳ میلیون دالر برق به افغانستان صادر کرده است.

رئیس شرکت ملی برق تاجیکستان، در مورد میزان دقیق قرض‌داری افغانستان اظهارنظر نکرده است، اما یک مقام تاجیک قبلاً گفته بود که افغانستان حدود ۵۰ میلیون دالر بابت نپرداختن حساب پول برق از تاجیکستان قرض‌دا می‌باشد.

براساس گزارش آسیا پلاس، رئیس شرکت ملی برق تاجیکستان در ماه جنوری سال روان میلادی، اعلام کرده بود که افغانستان، ۳۳ میلیون دالر به خاطر واردات برق از تاجیکستان قرض‌دار است.

شرکت برق افغانستان (برشنا) در آن زمان قول داده بود که پول باقی‌مانده صرفیه برق را در ماه فبروری سال روان به تاجیکستان پرداخت ‌می‌کند.

برق افغانستان بیش‌تر از ایران، تاجیکستان، ازبیکستان و ترکمنستان وارد می‌شود و پرداخت بل برق به دلیل تحریم‌های امریکا علیه بانک مرکزی، به تعویق افتاده است.

این در حالی است که روز دوم جوزا، برنامه توسعه سازمان ملل (UNDP) نیز از عدم پرداخت پول برق وارداتی افغانستان به تاجیکستان و ازبیکستان هشدار داده و گفته بود که اگر این کشورها برق صادراتی خود را قطع کنند، در افغانستان 10 میلیون تن در تاریکی قرار می‌گیرند.

هشدار برنامه توسعه سازمان ملل از عدم پرداخت پول برق افغانستان