پروژه مشترک نظامی تاجیکستان و امریکا در مرز افغانستان

امریکا از ساخت چندین پایگاه مرزی و اعطای هواپیماهای بی‌سرنشین به نظامیان تاجیکستان، به منظور تحکیم امنیت سرحدات این کشور با افغانستان خبر می‌دهد.

پیک‌آفتاب: جان مارک پامرشایم، سفیر امریکا در نشست اخیر خود به مناسبت سی‌امین سالگرد برقراری روابط دیپلماتیک کشورش با تاجیکستان از ساخت چندین پایگاه مرزی و اعطای پهپاد به این کشور خبر داد.

بر اساس اظهارات سفیر امریکا در دوشنبه، قرار است برای وزارت دفاع تاجیکستان در مرز مشترک با افغانستان و ازبکستان، یک پایگاه جدید برای 900 نظامی تاجیک و خانواده‌های آن‌ها به ارزش 30 میلیون دالر و یک پوسته مرزی در مرز تاجیکستان با افغانستان با هزینه 3 میلیون دالر ساخته شود.

سفیر امریکا در دوشنبه تصریح کرده است که این کشور هفت پوسته مرزی دیگر نیروهای تاجیک در امتداد مرز با افغانستان را بازسازی می‌کند. وی گفته است که در آینده نیز به مرزبانان تاجیک در راستای نوسازی چنین امکاناتی، از جمله مراکز تربیت سگ کمک می‌گردد.

پامرشایم، در این نشست گفته است که به زودی توافق‌نامه‌ 20 میلیون دالری فروش هواپیماهای بی‌سرنشین «پوما» ایالات متحده به تاجیکستان با هدف تقویت نظارت بر حریم هوایی مناطق مرزی این کشور نهایی خواهد شد.