امریکا چرخ‌بال‌های نظامی افغانستان را به تاجیکستان می‌سپارد
رویترز می‌گوید ممکن است امریکا شماری یا تمام چرخ‌بال‌های نظامی کمکی امریکا به افغانستان را که پس از سقوط کابل به تاجیکستان انتقال یافته‌اند را به آن کشور بسپارد.
رویترز می‌گوید ممکن است امریکا شماری یا تمام چرخ‌بال‌های نظامی کمکی امریکا به افغانستان را که پس از سقوط کابل به تاجیکستان انتقال یافته‌اند را به آن کشور بسپارد.
پیک‌آفتاب: رویترز با نشر گزارشی به نقل از جنرال مایکل کوریلا می‌نویسد که او این موضوع را در دیدارش با مقام‌های تاجیکستان در پایان هفته گذشته مطرح کرده است.
رویترز به نقل از سفارت امریکا در تاجیکستان نوشته که فرمانده فرماندهی مرکزی امریکا (سنتکام) در کنار سپاس‌گزاری از نیروهای تاجیکستان به خاطر تامین امنیت این چرخ‌بال‌ها، گفته که امریکا با دولت تاجیکستان برای تعیین بهترین راه برای استفاده موثر و نگه‌داری از چرخ‌بال‌ها کار می‌کند.
جنرال کوریلا افزوده، آنان امیدوارند که بتوانند بخشی و یا تمام این هواپیماها و چرخ‌بال‌های نظامی را به دولت تاجیکستان تحویل دهند.
او گفته که کدام جدول زمانی دقیق برای انجام این کار مشخص نشده، اما تلاش می‌کنند که این کار زودتر انجام شود.
در پی سقوط کابل به دست طالبان در 15 آگست سال گذشته، خلبان‌های نیروهای هوایی دولت پیشین افغانستان که از سوی امریکا آموزش داده شده بودند، حدود 64 هواپیمای نظامی را به تاجیکستان و ازبیکستان انتقال داده‌اند.
685 نظامی و خدمه پرواز نیروهای افغانستان نیز با این هواپیماها به این کشورها پناه بردند که پسان‌تر بیش‌ترشان از سوی امریکا به هدف انتقال به این کشور، به قطر انتقال داده شدند.
این در حالی است که پیش‌تر طالبان از تاجیکستان و ازبیکستان خواسته بودند که این هواپیماها را به افغانستان برگردانند.
در همین حال؛ ملا محمد یعقوب مجاهد، وزیر دفاع طالبان چندی پیش در نشستی در کابل به تاجیکستان و ازبیکستان هشدار داده بود که اگر هواپیماهای نظامی افغانستان را برنگردانند، با پی‌آمدهای بدی روبه‌رو خواهند شد.
بر اساس اطلاعات موجود در آرشیف اداره سرمفتش ویژه امریکا برای بازسازی افغانستان و هم‌چنین وزارت دفاع امریکا، نیروهای هوایی افغانستان در ماه سرطان سال 1400 در مجموع 229 هواپیما و چرخ‌بال داشتند که از این میان تنها 167 فروند آن در داخل افغانستان موجود بودند. پس از سقوط کابل به دست طالبان، 64 هواپیما به تاجیکستان و ازبیکستان انتقال یافتند.
این در حالی مطرح می‌شود که پیش‌تر مقامات ازبیکستان گفته بودند که ده‌ها هواپیمای قوای هوایی افغانستان که توسط خلبان‌های حکومت پیشین این کشور به ازبیکستان منتقل شده‌اند، ملکیت امریکا بوده و به طالبان داده نمی‌شوند.
ازبیکستان: طیاره‌های دولت پیشین افغانستان به طالبان داده نمی‌شود
